काठमाडौं । निर्माता किरण नेपालीको डेब्यू निर्देशनमा ‘महाद शा’ नामक नेपाली फिल्म निर्माण हुने भएको छ ।
बुधवार राजधानीस्थित जमलको विश्वज्योति मलको राजा लाउन्जमा आयोजित कार्यक्रममा फिल्मको नाम घोषणा तथा प्री–टीजर सार्वजनिक गरिएको हो । लेकाली इन्टरटेन्मेन्टले निर्माण गर्ने फिल्मको प्री–टिजर बुढासुब्बा डिजिटलको आधिकारिक युट्युब च्यानलमार्फत सार्वजनिक गरिएको छ ।
निर्देशक नेपाली यसअघि दर्जनौँ फिल्ममा निर्माताको रूपमा संलग्न भइसकेका छन् । ‘महादशा’ को प्री–टीजरमा मुख्य कलाकार प्रमोद अग्रहरी, प्रेमा लामगाढे र हाकिम गुरुङलाई परम्परागत भेषभूषामा प्रस्तुत गरिएको छ ।
निर्माण पक्षका अनुसार अन्य कलाकारबारे जानकारी पछि दिइने छ । मनिष गौतमले लेखेको फिल्ममा राजेन्द्र के. शाह, श्याम मगर र अमला देवी राईले लगानी गरेका छन् । सुरज आचार्य कार्यकारी निर्माता रहेका छन् ।
फिल्मले संस्कार, संस्कृति, अध्यात्मसँगै समाजमा विद्यमान रहस्यमय घटनाक्रम तथा मानिसको जीवनमा ग्रह–नक्षत्र र कर्मको प्रभावलाई कथावस्तुमा समेट्ने निर्माण पक्षले जनाएको छ । प्राेडक्सन म्यानेजर अनिश अधिकारी र समर चाैलागाई रहेको फिल्मको प्रदर्शन मिति भने छायांकन पूरा भएपछि मात्र घोषणा गरिने छ ।
