काठमाडौं । निर्देशक झरना थापाले आफ्नो चर्चित फिल्म ‘ए मेरो हजुर’को पाँचौं श्रृंखला ‘ए मेरो हजुर ५’को छायांकन सुरु गरेकी छन् । शुक्रबार ललितपुरस्थित बंगलामुखी मन्दिरमा शुभसाइत पूजा गर्दै फिल्मको छायांकन थालिएको हो ।
सुहाना इन्टरटेनमेन्टको ब्यानरमा निर्माण हुने फिल्ममा अनमोल केसी र सुहाना थापाले शीर्ष भूमिकामा निरन्तरता पाएका छन् । फिल्ममा दिलिप रायमाझी, झरना थापा, सलोन बस्नेत, नीरज पन्थी र आशा भुसालको समेत अभिनय रहनेछ ।
फिल्मको छायांकन काठमाडौंसँगै बाजुराको प्रसिद्ध बडिमालिका मन्दिर र खप्तड राष्ट्रिय निकुञ्जमा गरिनेछ । धार्मिक तथा पर्यटकीय स्थललाई फिल्ममा समेट्दै पर्यटन प्रवर्धन गर्ने उद्देश्य रहेको निर्देशक थापाले बताएकी छन् ।
यसपटक झरना थापा निर्देशकसँगै अभिनेत्रीका रूपमा पनि देखिँदैछिन् । ‘ए मेरो हजुर’को पहिलो भागमा अभिनय गरेकी झरना २५ वर्षपछि पुनः श्रृंखलामा फर्किन लागेकी हुन् । उनको भूमिका भने गोप्य राखिएको छ ।
निर्माता सुनिलकुमार थापा रहेको फिल्म २०८४ सालको बैशाखमा प्रदर्शन गर्ने लक्ष्य राखिएको छ ।
