झापा। प्रदर्शनको तयारीमा रहेको नेपाली चलचित्र ‘पाँच पाण्डव’को आइटम गीत ‘राजा चाहिया छ’ सार्वजनिक भएको छ । क्यासिनोको आकर्षक सेटअप, झिलिमिली माहोल र अभिनेत्री इभा गिरीको बोल्ड अवतारले गीतलाई विशेष बनाएको छ ।
सार्वजनिक गीतमा इभा गिरीलाई आकर्षक नृत्य तथा ग्ल्यामरस लुक्समा प्रस्तुत गरिएको छ । शाही शर्मा मजगन्याको शब्द, अर्जुन पोखरेलको संगीत तथा एलिना चौहान, सुरेश लामा र ध्रुव विकेको स्वर रहेको गीतले चलचित्रको प्रचारमा थप रौनक ल्याउने देखिन्छ ।
वसन्त निरौलाको निर्देशनमा तयार भएको चलचित्र आगामी कात्तिक २० गतेदेखि देशभर प्रदर्शनमा आउने तयारीमा छ । नवीन श्रेष्ठको प्रस्तुति र कालीरानी श्रेष्ठको निर्माण रहेको चलचित्रका लेखक सुशील पौडेल हुन् ।
चलचित्रमा नेपाली सिने क्षेत्रका चर्चित कलाकारहरूको बलियो उपस्थिति छ । हरिवंश आचार्य, जितु नेपाल, आर्यन सिग्देल, महेश त्रिपाठी, सुशील सिटौला, दीपाश्री निरौला, इभा गिरी, सरिता गिरी, प्रशान्त ताम्राकार र विनोद न्यौपाने लगायतका कलाकारले अभिनय गरेका छन् । बाल कलाकार अनुष्का ढुङ्गाना र इभा प्याकुरेल पनि चलचित्रमा देखिनेछन् ।
द्वापर युगका पाँच पाण्डवका पात्रहरू कलियुगमा आइपुग्दा कस्तो जीवन बाँचिरहेका होलान् ? यही रोचक परिकल्पनालाई कथाको आधार बनाएको चलचित्रले दाजुभाइबीचको सम्बन्ध, पारिवारिक भावना र आपसी सम्बन्धका विविध पक्षलाई प्रस्तुत गर्नेछ ।
पौराणिक पात्रहरूलाई समकालीन परिवेशमा जोडेर तयार गरिएको फरक कथावस्तु, चर्चित कलाकारहरूको जमघट र आकर्षक गीत–संगीतका कारण ‘पाँच पाण्डव’ दर्शकमाझ प्रतीक्षित चलचित्र बन्ने अपेक्षा गरिएको छ ।
