काठमाडौँ । फिल्म ‘सुख-दु:ख’ मा भारतीय छायाकार कबीर लाल र शाहिद लाल अनुबन्धित भएका छन्। निर्माण पक्ष र उनीहरूबीच औपचारिक सम्झौता भएको फिल्मकी निर्देशक नीता ढुंगानाले बताइन्।
कबीर लालले तेलुगु, तमिल, कन्नड र हिन्दी भाषाका ८० भन्दा बढी फिल्म छायांकन गरिसकेका छन्। शाहिद लालले मुख्यतः कन्नड र तेलुगु फिल्म छायांकन गरेका छन्।
फिल्मको वितरण अधिकार उपत्यकाबाहिर एफडी कम्पनीले लिएको छ भने उपत्यकाभित्र रिच इन्टरटेनमेन्टले पाएको छ। निर्देशक ढुंगानाले उपत्यका बाहिरका लागि छविराज ओझा र उपत्यकाभित्रका लागि करण श्रेष्ठलाई वितरणको जिम्मा दिएको जानकारी दिइन्।
फिल्म नीता फिल्म्सको ब्यानरमा बन्न लागेको हो। ‘मलाई निर्देशकको रूपमा विश्वास गर्नु भएकोमा सबैलाई मनदेखि धन्यवाद। ‘सुख-दु:ख’ हाम्रो सांस्कृतिक भावना र कथामा नयाँ आयाम थप्नेछ,’ निर्देशक ढुंगानाले भनिन्। याे उनको दोस्रो निर्देशन हो। यसअघि नीताले ‘ह्रस्वदीर्घ’ निर्देशन गरेकी थिइन्।
