काठमाडौं । चलचित्र ‘बाः एक योद्धा’ सुरुमा काठमाडौंभन्दा बाहिरका दर्शकमा पुगेको छ । प्रायः नेपाली सिनेमा काठमाडौंका दर्शकलाई सुरुमा देखाएर निर्माताले मोफसलका दर्शकमा पुर्याउँछन् ।
तर, ‘बाः एक योद्धा’ सुरुमा काठमाडौं बाहिर प्रिमियर भएको छ, त्यो पनि एक ठाउँमा होइन चार ठाउँमा । ‘बाः एक योद्धा’ नेपालगञ्ज, दाङ, धरान र बुटवलका दर्शकमाझ प्रिमियर गरिएको छ ।
चारवटा मुख्य सहरका दर्शकमाझ प्रिमियर गरेपछि बल्ल काठमाडौंमा यो चलचित्र प्रिमियर हुने भएको छ । असोज ६ गते ‘बाः एक योद्धा’ काठमाडौंमा प्रिमियर गर्ने तयारी निर्माणपक्षले गरेको छ ।
मोफसलबाट उत्साहजनक प्रतिकृया पाएको निर्माणपक्ष अब काठमाडौंका दर्शकको प्रतिकृया लिन आतुर छ । “हामीले जसरी नेपागञ्ज, दाङ, धरान र बुटवलका दर्शकबाट सोचेभन्दा पनि राम्रो फिडब्याक पाएका छौँ, त्यस्तै प्रतिकृया काठमाडौंबाट पनि पाउने अपेक्षा गरेका छौँ,” निर्देशक हरि लम्साल भन्छन्, “हाम्रो सिनेमा जस्तो लागेको छ, त्यस्तै प्रतिकृया सामाजिक सञ्जालमा राखिदिन हुन आग्रह पनि गरेका छौँ ।”
प्रिमियरमा चलचित्र हेर्ने अधिकांशले तारिफ गरेको निर्माता वसन्त लम्सालले जानकारी दिए । “दिव्य देवको सिने करियरकै ट्रनिङ पोइन्ट बा: एक योद्धा बन्छ भनेर भन्नु भएको छ,” निर्माता लम्सालले भने, “सुहाना थापाको अहिलेसम्मको फरक र राम्रो चलचित्र भन्नु भएको छ ।”
प्रिमियरमा सिनेमा हेरेर निस्किएकी एक युवतीले भनिन्, “अहिले मेरो बा हुनुहुन्न । तर, यो सिनेमाको बाले जस्तै हामीलाई स्ट्रगल गरेर हुर्काउनु भएको हो । उहाँको सेन्डो सधैँ च्यातिएको हुन्थ्यो । तर, मलाई र मेरो ममीलाई कहिल्यै पुरानो लुगा लगाउन दिनु भएन । यो सिनेमा हेरेर मैले मेरो बालाई मिस गरेँ ।”
सिनेमा हेरेर निस्किएका एक युवकले भने, “बुवाले गरेको संघर्ष नबुझेका सन्तानले एक पटक यो मुभी त हेर्नैपर्छै, देखाउनै पर्छ ।”
“बुबाआमालाई सन्तानले कहिल्यै घात गर्नु हुँदैन भन्ने सन्देश सिनेमामा छ । बुवाले जसरी सिनेमाको सुरुदेखि अन्तिमसम्म दर्दनाक दुःख गर्छ, त्यो कथाले मेरो मन छोयो,” सिनेमा हेरिसकेकपछि एक महिलाले प्रतिक्रिया दिइन् ।
सिनेमामा बाबु र छोरीको कथा मन परेको दर्शकको प्रतिक्रिया दिइरहँदा युवतीहरूले भने, “हो यस्तै बुवा हुनुपर्छ । यस्तो बुवा भयो भने कुनै पनि छोरीले अन्याय भोग्नु पर्दैन ।” अभिभावकीय जिम्मेवार पूरा गरेको सिनेमा भन्दै सबैले हेर्नुपर्ने सिनेमा भन्दै दर्शकले ‘बा: एक योद्धा हेर्न आग्रह गरेका छन् ।
अडियन्स प्रिमियरमा कलाकार दिव्यदेव, सुहानासँगै अनिल बुढाथोकी र सुप्रज्ञा शर्मा तथा निर्देश हरि लम्साल, निर्माता वसन्त लम्साललगायत उपस्थित थिए । बुधबार दाङमा ‘बा: एक योद्धा’को ग्रान्ड प्रिमियर हुँदै छ ।
असोज ९ गते रिलिज हुने ‘बाः एक योद्धा’ नेपाली समाजमा परिवारमा सन्तानको भविष्यका लागि बुवाले गर्ने त्याग, संघर्ष र जीवनभर झेल्ने चुनौतीहरूको कथा हो ।
यो चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापा मुख्य भूमिकामा छन् । हरि लम्सालको लेखन तथा निर्देशन रहेको चलचित्र ‘बाः एक योद्धा’ आर्टिस्टिक इन्टरटेनमेन्टको ब्यानरमा निर्माण भएको हो । यो चलचित्रको कथासँगै पटकथा पनि लम्साल आफैँले लेखेका छन् ।
चलचित्र ‘बाः एक योद्धा’का निर्माता वसन्त लम्साल हुन् । अनिल बुढाथोकी कार्यकारी निर्माता रहेको चलचित्रका लाइन प्रोड्युसर अर्जुन पौडेल हुने भने सह–निर्माता कृष्ण काफ्ले रहेका छन् । शिवराम श्रेष्ठको छायाकंन रहेको चलचित्रको मुख्य सहायक निर्देशकमा तारानाथ न्यौपाने छन् । ‘बा: एक योद्धा’ आशिष एच तामाङ र प्रदीप धामीको कुवेर सिने डिस्ट्रिब्युसनले वितरण गर्नेछ ।
