बिर्तामोड । पछिल्लो समयकी निकै चर्चित र लोकप्रिय गायिका शान्तिश्री परियारका प्रशंसकहरूका लागि खुसीको खबर छ । आफ्नो सुमधुर आवाजले लाखौँ श्रोताको मन जित्न सफल गायिका परियारको व्यस्तता नेपाली सङ्गीत बजारमा झन् चुलिँदै गएको छ । यसै क्रममा उनका नयाँ पाँच वटा गीतहरू बजारमा आउन लागेको जानकारी उनले आफ्नो सामाजिक सञ्जाल फेसबुकमार्फत खुलासा गरेकी छिन् ।
नेपाली लोक तथा सुगम सङ्गीत क्षेत्रका स्थापित तथा दिग्गज सर्जकहरूसँगको सहकार्यमा तयार भएका यी गीतहरूले श्रोतामाझ फेरि एकपटक नयाँ तरङ्ग ल्याउने विश्वास गरिएको छ । गायिका परियारले फेसबुकमार्फत सार्वजनिक गरे अनुसार बजारमा आउन लागेका पाँच गीतहरूको विवरण यसप्रकार छ :
१. अभागी छोरी
शब्द सन्तोष पौडेलको रहेको यस गीतमा जय देवकोटाको सङ्गीत र हेमन्त शिशिरको एरेन्ज रहेको छ । गीतमा शान्तिश्री परियारको एकल स्वर सुन्न सकिनेछ ।
२. दिल माग्यो मायाले
यो गीतमा सुवास दाहाल र सौगात श्रीको शब्द तथा सङ्गीत रहेको छ । शाह शाक्यको एरेन्ज रहेको यस गीतमा गायक दशरथ चौधरी र शान्तिश्री परियारको संयुक्त स्वर सुन्न पाइनेछ ।
३. नयाँ गीत (शीर्षक खुलाउन बाँकी)
विशाल कँडेलको शब्द तथा सङ्गीत रहेको यस गीतमा रमेश सेन्चुरीको एरेन्ज र सुमन रानाको रेकर्डिङ रहेको छ । यो गीतमा पनि शान्तिश्रीले नै आवाज दिएकी छिन् ।
४. आमाले दिएको माटे कराई
रामजी लम्सालको शब्द तथा सङ्गीत रहेको यस गीतलाई सुमन रानाले रेकर्ड गरेका हुन् भने यसमा शान्तिश्री परियारको एकल स्वर रहेको छ ।
५. करिमै
विष्णु न्यौपानेको शब्द रचना रहेको यस गीतमा विनोद बाजुरालीको एरेन्ज रहेको छ । यस गीतमा चर्चित लोक दोहोरी गायक खुमन अधिकारी र शान्तिश्री परियारको जुहारी सुन्न पाइनेछ ।
एकपछि अर्को हिट गीत दिँदै आएकी शान्तिश्रीको यो व्यस्तताले उनी वर्तमान नेपाली सङ्गीत जगत्की निकै रुचाइएकी र माग भएकी गायिका हुन् भन्ने पुष्टि गर्छ ।
फेसबुकमा यो जानकारी सार्वजनिक भएलगत्तै सङ्गीतकर्मी तथा शुभचिन्तकहरूले उनलाई बधाई र शुभकामना दिँदै नयाँ गीतहरूको प्रतीक्षा गरिरहेको प्रतिक्रिया दिइरहेका छन् । यी पाँचै वटा गीतहरू छिट्टै नै भिडियोसहित बजारमा आउने तयारीमा रहेका छन् ।
