मार्भल स्टुडियोको बहुप्रतीक्षित सुपरहिरो फिल्म ‘स्पाइडर–म्यान: ब्रान्ड न्यू डे’ लाई लिएर विश्वभरका दर्शकमाझ ठूलो उत्साह देखिएको छ। विशेषगरी भारतीय दर्शकमाझ टम हल्यान्ड अभिनीत स्पाइडर–म्यानको नयाँ कथाप्रति निकै आकर्षण बढेको छ।
फिल्म प्रदर्शनअघि निर्माण टिमले यसको फाइनल ट्रेलर सार्वजनिक गरेको छ। ट्रेलरमा पिटर पार्करको जीवनका भावनात्मक पक्षसँगै रोमाञ्चक एक्सन दृश्यहरू समेटिएका छन्। साथै, स्पाइडर–म्यानको संघर्ष, नयाँ सुरुवात र उसले सामना गर्ने चुनौतीहरूको झलक पनि ट्रेलरमा देख्न सकिन्छ।
ट्रेलरमा पिटर पार्करले आफ्नो विगतका सम्बन्ध र साथीहरूलाई सम्झिरहेको देखाइएको छ। सबैभन्दा पीडादायी पक्ष भनेको, जसका लागि उनी सधैं साथमा उभिए, ती मानिसहरूले नै अब उनलाई चिन्न नसक्नु हो।
आफ्नो पहिचान गुमाएपछि पिटरले नयाँ जीवन सुरु गर्ने प्रयास गरेको देखिन्छ। तर सुपरहिरोको जीवन सहज नहुने भएकाले उनले चाँडै नै नयाँ खतरा र शक्तिशाली शत्रुहरूको सामना गर्नुपर्छ। ‘स्पाइडर–म्यान: ब्रान्ड न्यू डे’ को फाइनल ट्रेलरमा आकर्षक एक्सन दृश्यहरू समेटिएका छन्, जहाँ पिटर पार्कर नयाँ दुश्मनहरूसँग भिडिरहेको र ठूला संघर्षका झलकहरू देख्न सकिन्छ।
यसबाहेक, ट्रेलरमा हल्क र स्पाइडर–म्यान बीचको भिडन्तले दर्शकको विशेष ध्यान तानेको छ। यी दुई सुपरहिरोबीचको सामना फिल्मको सबैभन्दा ठूलो आकर्षणमध्ये एक हुने अपेक्षा गरिएको छ।
टम हल्यान्ड अभिनीत ‘स्पाइडर–म्यान: ब्रान्ड न्यू डे’ विश्वभर जुलाई ३१ मा प्रदर्शन हुनेछ भने भारतमा जुलाई ३० देखि नै सिनेमाघरमा रिलिज हुनेछ।
फिल्मको अग्रिम टिकट बुकिङ सुरु भइसकेको छ र दर्शकमाझ टिकटको माग उच्च देखिएको छ। मार्भलको यो नयाँ प्रस्तुतीले बक्स अफिसमा उत्कृष्ट सुरुआत गर्ने अपेक्षा गरिएको छ।
